(لقاء الألينز بالهاوي الكبير الأستاذ علي عبدالنعيم_الجزء الثالث والأخير)
نواصل حديثنا مع الأستاذ علي عبد النعيم، نرجو لحضراتكم متابعة مفيدة وممتعة :
وقد وجهت سؤالاً للأستاذ علي عبد النعيم، في رأيك ماهي أنواع الغزار التي مازالت متوفر بها عدداً معقولاً من الحمام ذو المستوى الجيد، وماهي أنواع الغزار النادر أن تجد فيها حمام بمستوى جيد؟، فقال سيادته : الصوافة والبلق القشر بندقات مازالوا واقفين على رجليهم، هاتلاقي حمام جيد منهم بنسبة كبيرة شوية، والمساويد كمان يوجد منهم مستوى جيد في عدد كبير من النوع، والبلق الخضر إبتدأ يظهر من يهتم بهم ويبقى فيهم حمام كويس، لكن البلق البنفسجيات أصبحت نادراً لما تجد حمامة جيدة، والبلق السكروتات أيضاً الجيد منهم قليل، وعشان نحيي الحمام ده من رأيي نكتر منه شوية بالتركيز عليه بالفرخ، وبعد كدة ها نفكر ممكن نعمل إيه، يعني لازم بعض الغواي يهتموا بالأنواع دية ويركزوا فيهم ونحييهم من جديد.
ويستطرد سيادته : الحمام الغزار يوجد منه أنواع فيها فنيات عالية وعايزة شغل جامد عشان نوصل لمستوى كويس، وكمان بعد مانوصل للمستوى الكويس عايزين شغل عشان نحافظ على المستوى اللي وصلنا له، مثل السكروتة والأخضر عايزين شغل، ومن جهة بيكون لدى الهاوي حمام جيد ينفع للفرجة والفرخ معاً، وحمام تاني لا يصلح للفرجة ده حمام فرخ بس لأنه فيه أساسيات جيدة وله أصول جيدة فبيفرخ كويس، وفي الحمام ذو المنقار السميك، من أساسيات حمام الفرخ يكون فرد الحمام عضمه عمران، ده ها يفرخ كويس.
وقد وجهت له سؤالاً آخر حول ما هي نصيحته للهاوي الجديد الذي يريد أن يفرخ حمام غزار؟، فقال سيادته : لازم الغاوي الجديد للغزار يبدأ يتعلم تقليب الحمام، ولازم كمان يتعلم يخدم ويرعى الحمام صح، وفي الفرخ يبدأ يتدرب ويتدرج، يعني يجيب حمام متوسط بس يكون من عند غواي كويسين، يعني يجيب سردة غواي، عشان ده حمام خامة كويسة يتدرب فيها، ويتعلم اللاؤ الصح، يعني يتعلم مثلاً إزاي يسلف المواصفات من حمامة للتانية، بمعنى عندي عيب في حمامة إزاي أضيع العيب ده من أولادها وده بإني أكمل النقص اللي فيها أو أعوض النقص اللي فيها بلاؤ مناسب وده أحياناً بنسميه لاؤ تكميلي أو تعويضي، وكمان من خلال خبرتي في الفرخ بقول إني غية الغزار غية إناث، يعني لازم لو عايز تعمل مستوى جيد، يبقى عندك إناث مستواها جامد، دية هي اللي ها تظبط معاك الفرخ.
وجديراً بالذكر أننا ناقشنا مع الأستاذ علي عبد النعيم مواصفات كل أنواع الحمام الغزار، وهو طبعاً أبدى وصفاً أكثر من رائع وجيداً جداً لكل أنواع الغزار تقريباً، وتلاحظون حضراتكم الصور وهو في أحدها يصف لنا القنطرة الموجودة في جبهة البلق، وللأستاذ علي أراء في غاية الأهمية في موضوع المواصفات، وطبعاً هذه لم ننشرها في المقالات بل سنضيفها إلى مالدينا في منظمة الألينز من مواصفات للحمام الغزار، لكي تظهر إلى النور في وقتها المناسب ضمن المشروع الكبير برعاية الألينز، وبمعاونة كبار وحرفاء الهواية المصرية، في وضع المواصفات القياسية للحمام الغزار، وفي النهاية نشكر الهاوي الكبير الأستاذ علي عبد النعيم على هذا اللقاء الممتع، ونشكر حضراتكم على حسن المتابعة.
ليست هناك تعليقات:
إرسال تعليق